حلطمه 101

قوه .. ودي اكتب من اول ماسويت البلوق

بس مااكو مجااال ولاافكار ..

اول شي بعطيكم فكره عن نفسي عشان التحلطم يكون على سنع

سلمكم الله متخرجه شهر يونيو 2008 من كليه العلوم الاداريه

وتوظفت قبل جم شهر بقطاع الحكومه ..

واول شي بتحلطم عنه الشغل والدوام .. وما ادارك ما الدواام

الحق ينقال المكان وساعات العمل حلوه .. وحتى معظم المحيطين فيني محترمين حمدلله

اول شي لازم تعرفون ان طبيعه شغلي اغلبها مذكرات وكتب وقرقه وصياغه كلام وتفلسف

واهني مربط الفرس..

شي طبيعي لما اكتب المذكره او الكتاب او غيره ..لازم يتوقع من عده مسئولين

وطبعاااا كل مسئول لازم يضيف لمسته الخاصه ويثبت وجوده !!

تعديلات سخيفه .. فاصله .. نقطه

بدل كلمه "تدعى" يحط كلمه "تسمى" .. وبعدين يرجع يعدلها الى "تدعى" مره ثااانيه

وترى هذا مجرد مثال بسيط جداً جداً

اوكي خل يعدلون على كيفهم .. لكن مو لما الكتااااب يكون مكتوب عليه عاجل جداً

لا بعد هالايام هابين لي بـ "عاجل جدا الان " .. عيل عاجل جدا باجر !! اكيد الان

طالعين لي فيها يعني ..قال الان قال

تخيلوا قبل جم اسبوع .. معطلين موضوع "عاجل" على قولتهم لمده 4 اياااام ..

والسبب .. كل واحد يقول نكتب الكتاب لشخص غيييير

واحد يبي يكتبه لمدير اداره ..والثاني لوكيل وزاره والثالث لمادري منو ..

انزين ردوا عاللي راسلنا بالاساس وكفى الله المؤمنين شر القتال

بس نعجبكم بالدوام ..قمنا نتراهن اذا الموضوع راح يتعدل ولا يمشي ..

للحين محد راهن على ان موضوع يمشي من اول مره

حمدلله زملائي وزميلاتي كلهم يتمتعون بالواقعيه ..

خااتمه

رساااااله موجهه الى كل واحد عارف بينه وبين نفسه ان تعديلاته على غير سنع وماتضيف للموضوع شي

" دوروولكم طريقه ثانيه تحللون معاشاتكم فيها "

يعني بالذمه واصل هالمنصب وبس قاعد طول اليوم تعدل كلمه وكلمتين

وين الانجازات ياربي .. وينهااااااااااااا

تمت الحلطمه بنجاح

.. حاولت اني اختصر الحلطمه واتكلم عن موضوع واحد

(لاحظواا ان كل هذا مختصر ترى )

والقادم اجمل انشالله =)

...